近排發生咗一件事令我感受到香港同英國請客文化嘅差異。話說我有一位啱啱移民咗嚟英國嘅香港老朋友，佢話想 “host 個 party” 同「請」唔同朋友上佢屋企打邊爐，仲叫我請埋我嘅 local 英國朋友。
當日晏晝去到佢屋企，我同我嘅 local 朋友都各自帶咗一支酒俾主人家，見到滿枱食物我哋同佢講好多謝佢預備咗咁多嘢食。Party 有 10 個人，大部份係香港人。大家打完邊爐好滿足，仲坐埋一齊玩咗兩個鐘 board game 先返屋企。
令我詫異嘅係，第二日收到主人家 message 話俾我聽打邊爐材料除返開每人嘅價錢，請我同 local 朋友過返我哋嗰份錢俾佢。
咁我其實喺英國住咗好耐，未移民前喺香港仲係一個小朋友所以未有呢種開 party 要夾錢嘅經歷。但一直以來喺英國參加 party（冇一早講定要夾錢嘅情況下） 就係 assume 主人家請客，主人家俾錢。而我嘅 local 朋友都覺得呢個係 weird behaviour。不過我哋當然都有過返數（亦唔係咩大數目）。
事後我問返我另外一個住喺香港嘅朋友，佢同我講喺香港 host party 事後問人攞返錢好正常，之後我都有同返我 local friend 講話呢個應該係文化差異問題。
我想知大家點睇，我明白如果係大家一齊決定要去一個人屋企打邊爐、燒嘢食、嗌外賣等等夾錢係正常。但如果有香港人「請」你去佢屋企而又冇事先講明要夾錢，你係咪都 expect 事後要找數？條線係點樣劃分？例如你只係提供飲品或者自己煮飯，係咪就唔會問人夾返錢？定係其實係我個 friend 嘅做法係唔正常？
