原來職場都可以係心靈嘅避風港？

今年 1 月對我嚟講係一段情緒崩潰嘅日子。我同男朋友喺英國認識，拍咗兩年拖，本身各自有自己地方住，但佢一直氹我搬去同佢一齊住，話想建立一個「共同嘅生活」。我信咗佢，搬咗過去，一心以為係向住未來行緊。 點知，佢去咗澳洲做畫畫工作冇幾耐，就突然用 WhatsApp 同我講分手。冇預兆、冇對話，連面都唔見就一句話搞掂。

最心寒嘅係，佢仲話我要喺一個月內搬走，話得好似係畀租客通知搬屋咁——冷冰冰，冇感情，好似我係佢生活中多出嚟嘅包袱。 我攞住部電話呆咗好耐，心入面一片空白。點解可以咁無情？兩年感情就咁收場？嗰晚我一晚冇訓，眼淚一直流，腦入面只係不停重播住一句：「我可以去邊？我仲有咩可以攬住？」

我係一個實幹嘅人，唔鍾意喺人面前示弱，但嗰日返酒店返工真係頂唔住，一開口講到一半就忍唔住喊。冇諗過，平時只係hea傾計嘅同事，竟然一個一個走埋嚟安慰我，陪我傾偈。仲有個同事話：「唔怕啦，你搵唔到地方住可以嚟我shareroom 度，我讓半張床俾你訓。」

你知唔知，嗰下我真係完全崩潰——喺我最冇安全感嘅時候，有人願意攬住我。 我個 manager 仲話：「唔好怕啦，我哋會幫你搬，你睇下，universe 都喺幫你。」佢講嗰句，我記到而家。喺我最無助嘅時候，竟然係職場上呢班「唔太熟」嘅同事，成為咗我生命入面嘅依靠。 今次件事令我明白，有啲人會用一個 message扔低你，但亦有人會用一張梳化、一句溫暖說話拉返你出嚟。原來職場唔止係返工咁簡單，亦可以係你心靈嘅避風港。