點解英國人咁鍾意即場拆賀卡？仲要朗讀出嚟？

話說我嚟英國讀大學嗰年識咗班幾好傾嘅朋友，當中除咗我同另一個香港同學（化名 Amy）之外，其他都係 locals。咁大家久唔久都會飯聚，而我同 Amy 同其中一個英國男仔（化名 Ron）特別 friend，大家會三個約出街。

到 Ron 生日嘅時候，大家約咗食飯。見面前我諗咗好耐使唔使準備咩禮物俾 Ron，因為其實我喺香港冇送生日禮物嘅習慣，通常都喺請個 friend 食餐飯。而中學就嚟咗英國讀書嘅 Amy 話，外國人通常都起碼會寫張卡，過時過節都鐘意收到賀卡，於是我決定花啲時間寫張長少少，講吓心底話嘅生日卡。

我張卡嘅內容大概就係好開心喺度讀書認識咗你，多謝你成日帶我地去玩之類（當時我都有諗過寫得會唔會太僑情/肉麻，但又覺得已經冇買禮物，寫卡唔想太 HEA）重點係 Ron 有同我同 Amy 分享過，佢鍾意咗一個女仔，但唔敢表白。於是我喺生日卡最尾加句 p.s.，內容大概係「祝你溝到條女，哈哈」。

到食飯當晚，我點到估唔到原來喺有朗讀生日卡環節。其中一個人食完飯就叫 Ron 開始拆禮物同卡，Ron 就逐一拆同大大聲讀啲卡出嚟。到我張卡時，我已經不斷向佢暗示，張卡好長㗎，好多無聊嘢，返屋企先慢慢睇之類。

點知 Ron 照拆出嚟讀。讀頭幾句，其他人已經喺度 wow wow 聲（可能覺得我寫得好激，因為其他人全部都係寫普通一兩句 “happy birthday” / “have a nice one!” 之類），我尷尬到面都紅晒。讀到最後 p.s. 嗰度，佢停咗冇讀，然後尷尬面紅大笑，其他人搶咗嚟睇，即刻質問佢係想追邊個女仔，而佢就求其作啲藉口帶過咗。

事後我向佢道歉，佢當然話冇所謂。但我真係好尷尬覺得自己好蠢，好似爆咗好朋友大鑊咁。

自此以後，我學精咗，寫卡俾人都係寫啲普遍大路嘢就算。

但我真係想知道，係咪所有英國人都鍾意當場朗讀卡嘅內容出嚟？因為對我嚟講，即場讀卡就有如即場拆人情一樣咁尷尬。

另外，大家寫卡嘅時候會係咩內容？寫太多會唔會俾人覺得係標奇立異？但如果寫俾好 close 嘅 friend 都只係寫啲普通嘅 “have a fab one!”，又好似有啲誠意欠奉？總之就好困擾 lol