終於明白香港人奴性真係好強…

唻左英國做左幾年野，最大感受係覺得自己真係奴性幾重。好多時 d 英國人覺得好少事，自己就勁緊張咁，唔知為乜。例如睇錯野，趕唔切 deadline 之類，基本上絕對唔會話你，直接就講 that’s fine，然後再做返岩就得，畀著響香港呀姐片足一日！咁當然佢地對自己都係咁啦，覺得大家都係人一個，偶然做錯野好正常，所以即使係佢自己做錯野，搞著你，佢哋都未必會講 sorry 㗎！

不過最令我深刻嘅一件事，係有一次我 department head 問我有冇興趣去 training，話某一個星期二響倫敦有個 talk 喎，咁我 check 完 schedule ok 咪答佢可以囉，點知轉個頭開完個會返嚟 check email，HR 話因為倫敦個 talk 已經 full 左，所以幫我 book 左第二日星期三去 birmingham 果個，仲要已經畀埋錢，話 department head 已經批准埋，如果我要 accommodation 都可以 claim 錢喎。

我一見到真係即刻 X 左聲，先莫講佢突然間要我山長水遠去第二個 city 聽一個 talk，兼且佢 book 果日我其實一早已經請左假諗住去玩，佢問都冇問聲就報晒名俾晒錢，即係我唔去都唔得啦？！真係喊出唻，第一時間睇吓自己有冇記錯請假日子，X！真係冇記錯！

我唔知大家遇到呢個情況會點做，但係如果畀著我舊公司，我絕對唔會敢出聲，自己再安排過放第二日就算數，特別係因為關埋 HR 事，因間多一事畀人媽叉返轉頭！其實今次我本身都諗住自己吞左佢就算，不停同自己講都係改一日假姐，又唔係有特別野要做咁其實邊日放都冇所謂啦，又同自己講人地都係心急驚 book 唔到先直接 book 左先姐，而家有得 claim 交通住宿咪當去下短 trip 囉！

但 X！！真係愈諗愈嬲，覺得自己冇理由唻到英國都仲要咁 toxic 咁過日子，委曲求全！佢地呢度 d 人自己都係請假大過天，況且佢真係冇問我在先，我今次點都要為自己出句聲！

結果，我選擇同我直屬呀姐講返件事，同佢講我覺得冇問過就先斬後奏好有問題。好彩，我呢個本地人呀姐好明白事理，尤其係要去第二個城市，所以佢即刻同返個 department head 講，話我根本一早就請左假，唔應該就咁 assume 我可以去。

後尾 department head 直接走唻搵我話傾下，我本身都少少淆，因為佢個人雖然 nice 但係都係嚴肅 type，點知佢一劈頭就同我道歉，話自己好多時做野都貪快，今次以為都係爭一日，所以冇諗到我會唔得。佢跟住仲叫我唔洗諗咁多，照放假，佢會同 HR 果邊講話我唔會去咁話喎。

首先，見到佢同我講 sorry 我已經倨晒啦，我話其實要我改假都唔係好大問題嘅，更何況已經畀左錢。點知個 head 堅持話唔想我改假，因為自己會 feel bad，然後佢仲話公司一年洗勁多錢落廣告，果百幾鎊報名費唔算得係 d 咩。經過幾番拉鋸之後，佢先話畀啲時間我自己考慮，仲再三同我講呢 d training 係好少事，唔好強迫自己！

之後我再同番呀姐傾，佢講左一句令我印象勁深刻，佢話：“It’s not like when he says ‘jump’ you need to say ‘how high’.” 我即刻話響香港連 ‘how high’ 都唔洗講已經跳左！佢就話都知道我會好擔心，但係呢度真係唔洗咁樣。咁當然，結果我都係諗住大家好唻好去所以都係改左假，呀 head 仲特登再問多次 “Are you sure?” 咁我就答返佢，“Yup. That’s my choice!” 心諗，畀著以前連揀都冇得揀！