喺公司都要做show and tell？

嚟咗英國之後第一份工就係喺呢間 start-up 公司度做文書，眨吓眼就做咗差唔多兩年喇。由上年年頭開始，佢哋就喺 all-hands 度加咗一個叫 Carte Blanche 嘅環節喺最後五分鐘，話想每個同事輪流做，講乜都得，等大家互相認識多啲喎。

雖然聽落去好似返咗去初中咁啲英文老師要你做 show and tell，但係其實都幾正。有啲同事會分享下自己以前去流浪嘅經驗、有啲人選擇講棟篤笑、又有啲人會介紹吓自己啲畫作呀，詩呀咁，除咗令到個會輕鬆啲之外，的確係可以令到大家嘅認識深咗嘅，因為我哋雖然都係得 50 幾人，但係始終都係 hybrid，唔係成日返公司吹水交流。我自己喺好開頭就已經俾人邀請做過一次，嗰次就介紹咗啲港式英文詞彙，例如 add oil 同 exact7ly 嗰啲，到而家都仲會有啲同事對住我講，話自己 adding oil，又或者叫我 add oil 咁，都幾過癮㗎～

不過，因為公司都真係比較細，近排我又俾人叫再做啦～本身都諗住又再教多幾個港式英文，不過今次諗諗吓，都係覺得要盡吓社會責任，同大家介紹吓香港嘅簡史同埋點解會多咗香港人嚟英國咁樣。因為我成間公司連埋我得三個香港人，另外兩個仲要其實係好細個就移民咗過嚟，講廣東話有口音嗰隻，所以今次都有少少 “If not me, then who?” 嘅感覺。

因為都係得五分鐘，所以講唔到好多詳細野，最主要都係講下香港以前係英國殖民地，1997 年回歸，回歸完之後去到 2019 又發生咗啲咩事，俾咗少少數據講吓有幾多人移咗民之類，大家都明㗎啦！不過估唔到嘅係，有唔少同事喺我講完之後都再私底下同我講多謝我嘅分享，有啲人同我講話唔知原來新界係英國租借 99 年，佢哋本身仲以為英國當年攞咗成個香港，又有啲人話完全唔知戴卓爾夫人當年喺北京仆低過，話聽到世界嘅另一邊原來對呢一幕咁深刻覺得好有趣喎！

最估唔到嘅係，有位 local 同事喺個會開完嘅一星期後再 DM 我，話自己之前放假所以嗰日先 catch up 返，話想多謝返我分享，仲祝福我哋移民過嚟嘅香港人 all the best，唔係講笑，收到嗰吓真係覺得非常窩心！

我都知唔少人覺得英國人啲「語言藝術」搞到啲外國人好 confused，唔知佢係讚定彈，而呢啲所謂嘅多謝同祝福對於部分人嚟講可能只係客套說話，甚至係偽善。但係好老實，我又唔係啲咩高層，如果唔係真係想表達吓 appreciation 都唔會特登 DM 啦。作為一個移咗民唔夠三年嘅人嚟講，聽到本地人嘅鼓勵同支持真係好緊要，所以都覺得好好彩自己公司有一個咁嘅機會，又好好彩真係有好好嘅同事會俾返正面嘅feedback！喺呢度都 pass 返我同事俾各位移英港人嘅祝福，希望大家真係 all the best!!